AMHLOPHE KUSIKHWAMA SE SIZWE SIKA MTHWAKAZI - 2022

Isikhwama sesizwe sikaMthwakazi sesiwungenile umnyaka omutsha ka2022. Amhlophe amakhulu kini lonke Mthwakazi Ondlela Zimhlophe elithe labalothando olukhulu lahlangana lazibumba ndawonye kulesi sikhwama seSizwe. Abadala abaqale phambikwenu ababeziqoqe bazibiza ngokuthi yi Mathebeleland Home Society babelesikhuthazo sabo esithi...”Masiyeni Phambili” Ngiyaseboleka lami ukuthi ngisisebenzise ngilenzela amhlophe ngisithi kini lonke “Masiyeni Phambili ngo 2022”

INKATHA

INkatha yomnotho ligoda eliphothwe ngentambo ezintathu, intambo yokholo, intambo yobukhosi lentambo yombuso. INkatha le ifukamela umnotho wabantu (iSizwe) lomnotho wezigaba (iLizwe).

Ilizwe linothe ngezemvelo, kuthi isizwe sinothe ngezakhiwo lezimpahla zenhlalakahle. Ngakho ke iLizwe lilemvelo kuthi iSizwe silamandla. Ezemvelo lamandla abantu bendawonye bebambene kudala umnotho.

Abantu nxa behlangene babumba amandla akabili, amandla okulwa lamandla okusebenza. Amandla okusebenza lamandla okulwa avela kwezempilo yomuntu yona evela kuNkulunkulu esimazi ngokukholwa. Yikho nje “Amandla” kuyiwo adala amagoda la amathathu....igoda lokholo, legoda kobukhosi legoda lombuso okuphotha iNkatha yomnotho yeSizwe leLizwe.

Kunjalo ke Mthwakazi, isizwe esimiyo saqina ngesile Nkatha yaso. Lina bakaMtwakazi kalilayo iNkatha yenu. Yachithwa ngamaKhiwa abambanayo abandawonye babumba inkampani (inhlanganiso) yabo eyaqoqa imali kwamanye amakhiwa, abathenga ngayo igoda lokholo lwesizwe sakibo, bathenga igoda lobukhosi besizwe sakibo, bathenga legoda lombuso wesizwe sakibo. Sebelawo la amagoda womathathu basebenzisa amandla abo okwakha baphotha iNkatha yabo yokwakha umnotho wabo. Yilowo mnotho laleyo Nkatha abeza ngayo basebenzisa amandla abo okulwa bazachitha iNkatha yenu kaMthwakazi. Yikho nje lamhlanje lingalayo eyenu iNkatha yomnontho. INkatha yomnotho ichitheka lamagoda ayo aphothwe ngawo.

Elikwenzayo ngesiKhwama seSizwe bakaMtwakazi yikuqoqa isikhali semali ukuthi ngesikhali lesi semali lisebenzise amandla enu lindawonye okwakha amagoda la amathathu, igoda lokholo, igoda lobukhosi, legoda lombuso ukuthi ngama goda enu la nxa selilawo lisebenzise amandla enu lakhe iNkatha yenu kaMthwakazi. INkatha iyakhiwa ngabantu bendawonye, kayizakhi, njalo akulasizwe esake sakhela esinye isizwe iNkatha. Njengoba nje ....akunyoni eyakhela enye inyoni isidleke sayo.

Njalo INkatha kayicelwa kwabanye abantu, iyakhiwa ngamandla abantu bendawonye, benjongonye.

IMALI

Imali iyisithutha ngoba injalo usithi ngeyakho isesikhwameni sakho iyasuka ivakatshe ikutshiye uhlezi endlini yakho iyesebenzela labo abaleNkatha zabo ezizweni zabo, iphinde iphenduke kuwe isilanda ukuthi wena uzoyichitha nje ngokuyidlulisela phambili kwabanye, ikutshiye uphethe nje izimpahla ezidlulayo njalo ezigugayo usale nje ebudaleni bakho usuphelelwe ngamandla ungelalutho sengathi kawuzange ubelamandla ekuphileni kwakho umzimba usaqinile. Emuntwini amandla kawavalelisi, ubona nje engasekho wena ulokhe usithi uyazi uyaphila, uzibone usuwedwa ungasanelisi kwenza lutho ngitsho nje lokuzenzela wena ulutho,khonapho ungaselalutho, yonke into owayithenga ngemali seyaguga yabola.

Kungena lapho ukuqakatheka kweNkatha yomnotho yeSizwe le Lizwe okungokwakho ekuphileni kwakho lapha emhlabeni ngoba kakho ozaziyo isikhathi sakhe sokufa lokuthi abakho obadabuleyo emhlabeni bona bazaphila isikhathi esinganani bengaphansi kweNkatha yesizwe sabobani esizabanikeza inhlalakahle enjani besesekulo umhlaba. Umdeni womuntu kawupheli kulo umhlaba yikho ukuphila kulelifa lamafa. INkatha yomnotho ingamafa lelifa labantu abazibumbe babandawonye bazibiza ngokuthi bayisizwe behlanganiswa luphawu lwemithetho yamaSiko abo.

YISIKHATHI SENU

Ngakho ke khathesi yisikhathi senu sokuthi libumbane libendawonye libuthelele imali yenu libambene lindawonye ibeyisikhali esikhulu ukuze liphothe amagoda aqinileyo lakhe iNkatha yenu yomnotho eqinileyo.

Ukuphila konke kuphathelane lezomnotho weLizwe lomnotho weSizwe. Akulani lokuphila komuntu emiyedwa ngoba ukuphila komuntu emiyedwa akusilutho kufana lokuphila kwehlamvu lesihlahla nje nxa lilodwa esihlahleni, liyoma, likhithikele phansi enhlabathini libole likhohlakale sengani kalizange vele libekhona kuleso sihlahla. Kodwa nxa lisabambene lamanye amahlavu, endawonye adala umthunzi omkhulu omuhle kakhulu osiza ngokwehlukeneyo izidalwa zonke.

Yibani lomnyaka olokuphumelela liphephe emikhuhlaneni esemoyeni kulo umnyaka esesiwungenile oka 2022. Lihlale liqoqana likhumbuzana ngokubumbana libendawonye ukuze lakhe AMANDLA amakhulu okwakha lokulwa. Libakhulu ngoba lina lingabantwana beziNkanyezi zezulu.

©Khulu Cont Mhlanga - December 2022