IDili kibo kaMfazi - Umtshado WeSintu Part 2. ---- #18

IDILI ELILODWA

Sekuvamile ukuthi imitshado ihlanganiswe yenziwe ibelidili elilodwa kulezi izinsuku. Idili elakibo kamfazi ledili elakibo kandoda ayesulwa angasenziwa besekusenziwa idili elilodwa. Leli dili elilodwa livame ukwenzelwa kibo kandoda kumbe kukhethwe indawo nje engaba yi hall kuyekwenzelwa lapho idili lomtshado leli.

Labo abatshada ngamadili anje bayabe benze izeleze nje eledili lomtshado wabo. Bayabe bengatshadanga ngokuphelelisa ukuthatha lokwenda phambi kwamaDlozi emideni yakwabo lakuNkulunkulu umdali wabo. Bayabe bephelelise ukuhlanganiswa kwabo phambi kwabangane babo lomantshi wabo kuphela.

Okungahlelwanga emoyeni emaDlozini lakuNkulunkulu kuhuga indubo ezinengi kakhulu ezenza kubelula ukuthi okuyinto kwakhona kuchitheke kuphele.Kunjalo langemitshado engahlelwanga emoyeni.

AMADILI OMTSHADO AMABILI

Amadili omtshado enzelwa three groups of people, amaDlozi emideni, izihlobo labangane, labomakhelwana. Bangasuthiseka bonke laba ngobuthathu babo uNkulunkulu abesesemukela abusise ngesibusiso sakhe esikhulu. Nxa laba ngobuthathu babo bengasuthisekanga uNkulunkulu kawemukeli lawo madili omtshado womabili.

Lokhu yikho okwenza amadili omtshado aweSizwe sikaMthwakazi abeliSiko eliqakatheke kakhulu. Lawo madili ahamba emabili kawahlanganiswa. Lidili lokuthatha elenziwa kibo kamfazi....lisenzelwa undoda uzothatha lapha kibo kamfazi, besekusiza idili lokwenda elenziwa kibo kandoda lisenzelwa umfazi osezokwenda lapha kibo ka ndoda.

Amadili la asetshenzwa ngemigido yawo eyesintu sezingoma lemigido yamadili emitshado abizwa ngokuthi yikuChanguza koMthimba. UkuChanguza kulezigaba eziyisikhombisa ezisebenzisa izingoma lemigido yakhona eyisikhombisa.

KuzaChanguzwa ke kibo kamfazi ilanga lonke, kudliwe, kunathwe, uMakoti aphiwe izipho yizihlobo, abangane labomakhelwana azazithwala ahambelazo ekwendeni kwakhe. Lezi kazisizo zipho zendoda. Kayiphiwa sipho loba kayikhungwa kibo kamfazi indoda ngoba kabayazi lapha ekhaya lasesigabeni lapha. Abamaziyo ngowabo umfazi osesukalapha ekhaya lalapha esigabeni esesiyaqalisa elakhe iguma kwesinye isigaba. Ngakho uyaphiwa izimpahla ezingezakhe azakuyaqalisa ngazo elakhe iguma. Abazali bakhe uyise lonina kabamkhungeli lapha ngakibo umtanabo. Bamkhungela kibo kandoda.

Yizo Lezo mpahla abakibo kandoda abazibophele inqola ukuthi bazozithwala kunye lomaKoti wabo lo baqonde laye kibo kajaha konke lezimpahla zakhe lezi. Idili lomtshado leli lizadlalwa kuze kuphume ilanga. Akulalwa.

UPHEHLO LOMUZI

Kusisa ekuseni uMakoti usephiwa uphehlo lomuzi nguyise esibayeni. Elinye igama lakho kuthiwa ludiwo lokuhlalisa umuzi.

Lapha ke kuhlanganiswa izihlahla zosendo lwesibongo salapha ekhaya salo Umdeni zifakwe ediweni kuthelwe amanzi. Ubaba useza thatha uphehlo lodiwo lolu abize umtanakhe aqondelaye esibayeni, bangene phakathi. Usezaguqa phansi ke umtwana athwale udiwo ekhanda, ubaba alutshaye uphehlo kusukume igwebu elikhulu elimhlophe nke lijuluke limehlele unkazana abemanzi umzimba wonke. Ngapha elikha igwebu leli elimhlophe elidla zandla zombili. Ubaba yena ekhuluma lamaDlozi lo Nkulunkulu ngapha etshaya uphehlo.

Lapha kuhlaliswa iguma lakhe umfazi lo osesiyakwenda, kuhlaliswa umuzi wakhe uqine. Konke okubi okweminyama yakibo esakhula kuzasala lapha esibayeni sangakwabo. Kuthi amaDlozi akwabo amahle ayekwenda laye ekwendeni kwakhe ukuze amvikele amkhokhelele amhlanganise loNkulunkulu ngokusa kwamalanga azahlangana laye lapha esibayeni bahambe laye babengumthunzi wakhe.

UKUDELELEKA

Nxa umfazi esuke kwabo engaphiwanga uphehlo lomdeni wakwabo uyadeleleka eyiseke ekwendeni kwakhe. Nxa esegumeni ubalesithunzi somuntu ongendanga afane nje lamankazana alapha ekhaya ashelwayo. Ngakho kudaleka umncintiswano kibo lapha kuqalise ukuphalwana kulwiwe lomakoti kubezima.

Kuninazala uMakoti ukhangeleka njengesithembo sakhe egumeni. Kabilesithunzi sikamalukazana. Kukhuthwana njalo nje umamazala loninazala. Isiphetho uMakoti ucina ehluthula umkakhe abaleke laye bayehlala bodwa ethi batshaywe ngumoya.

Kodwa lapha abazakuya khona uMakoti uzabelokhe ekhangeleka samuntu ongendanga le ndoda samuntu ongathathanga akhonjiswe uMakoti akhombise akhonjwe ujaha ngoba vele bobabili kabalazithunzi kibo ezokuthi sebethethene sebesakha umuzi.

Nxa beqeda esibayeni untombazana oyakwenda uphuma kuvulwe umbelo emuva emukelwe ngomthimba wakhe ngemva kwesibaya bahle bangene indlela baqonde kibo kandoda. Usemthethe ngakibo umfana wangena laye indlela. Esiyafika laye ngakibo kuzaduma u'wozalaye laye' kwabasemthimbeni kibo kajaha. Uzalaye nje ngoba uvela mthatha ngakibo.

Kasebenzi uwozalaye nxa livukalonke endlini beselisiyatshada edilini le holu. Nanko ke uMakoti ngokoSiko lakoMthwakazi uphuma ngedili ngakibo ayengena ngedili kibo kandoda.

UMBUZO LESIXWAYISO:

Kambe lisavuma yini iSiko lophehlo yemideni lamhlanje? - Yebo liyavuma sibili ngoba liSiko lomdeni. ISiko lomdeni kalifi ngoba Umdeni kawufi. Uyaletha imfundiso yosiko lwawo kunzalo yegazi labo. Thina abantu ngokuyengeka lokudukisana yithi nje esiyiphikayo leyo mfundiso evela kumideni yethu ithunyezwa ngamaphupho kithi siyilahlele khatshana sidume lokungasi kwethu.

Kodwa okomdeni akupheli, akubhuluki, akufi, akulahleki phansi....nxa ungowegazi lalo owomdeni kuzakulandela nje kuphela, wena ungakuphika uze ungene phansi kuzadlulela emuntwini omzeleyo olegazi lakho. Usizi yikuthi wena uzakuba ungasekho ukuthi umsize umqondise lo ongowegazi lakho. Usengathwala ukudubeka impilo yakhe yonke ngenxa yakho owaduhela iSiko lomdeni wakwenu ngenxa yokuthanda izinto.

Author - © Khulu Cont Mhlanga - 15st December 2021 

All Rights Reserved

Authorised publishers: #TheWalk