Amaxhiba Egumeni- Umtshado WeSintu Part 2. ---- #15

Isiko lamaxhiba emagumeni lapha selisiya liphela. Leli ke yilo isiko eliqedwa yibuyanga obeza lempilo yesikhiwa. Impilo yesikhiwa is very efficient ezintweni ezinengi kodwa igcwele ubuyanga ebantwini.

Nxa uphosa ilihlo nje udlula ubuka imizi eminengi sekwande ukuthi ubone izindlu ezimbili, indlu yokulala lomkulu nxa zithe zabantathu lesama yokucatshela ilanga nxa kutshisa.

Kodwa uthi uyakhangela abantwana egumeni uzabona kulabafana lamankazana, kulabadala futhi. Kanti pho kulalwa njani lapha kuleli khaya? Iqiniso yikuthi sekulalwa ndawonye abafana lamankazana, emizini eminengi ndawonye abadala labantwana. Esilungwini khona emadolobheni kasikhulumi kuzima. Kanti i'luxury yamaxhiba iyabe izavela ngaphi?

Baqala lapho ukungasa gobeki abantwana. Baqala lapho ukuba ngondabazabantu labo ndaba zezigaba abantwana. Baqala lapho ukufuna amacansi bebancane abantwana. Baqala lapho ukungahloniphi ubunqunu babadala abantwana. Baqala lapho ukungahloniphi abadala abantwana. Siqala lapho ukuchitheka isizwe sikaMthwakazi. Konke lokhu kwenziwa nje yikulahla ukuqakatheka kweSintu le Siko lamaxhiba abantwana koMthwakazi.

AmaXhiba yizindlu zabantwana ezakhelwa ngaphambili kweguma eyabafana ngesandleni senxele egumeni ngokuya lapho okulesibaya khona, kuthi eyamankazana esandleni sokudla kweguma ngokuya lapha okulendlu yabadala eyokulala. Umkulu ikhitshi phela belimiswa ngokuyaphakathi laphakathi kweguma ngaseceleni kwendlu yokuhlala.

Amaxhiba abelemithetho eqinileyo egumeni lapha ngoba yiwo abumba abadala bakusasa besizwe. Abafana bebengavunyelwa khona nje ukusondela exhibeni lamankazana let alone ukungena phakathi. Kungena umama kuphela exhibeni lamankazana. Ubaba kangeni lapho.

Kuyafana lexhibeni labafana. Akungeni nkazana, akungeni mama lapha exhibeni.

Akungeni kudla emaxhibeni lapha. Ukudla konke kuphelela emkulwini lase gumeni lasendlini yokuhlala. Akungeni lutho olunathwayo emaxhibeni, loba amanzi nje ngokwawo.

Akulampahla ezingasozabanikazi balelo xhiba ezingena kuleyondlu.Loba izimpahla zekhaya lapha kazingeni emaxhibeni abantwana.

Akulasethekeli esifika lapha ekhaya singene emaxhibeni abantwana. Loma kuyisihlobo salapha ekhaya esiseduze kanganani kasethekeli lapha ekhaya sibelelungelo lokungena emaxhibeni abantwana lapha ekhaya.

Nxa ku logogo lokhulu kaba ngeni emaxhibeni abazukulu babo. Kunye labangane babo abantwana bangabuya bezodlala loba bezokwejisela abangane babo lapha egumeni kabayi ngena emaxhibeni abo.

Akungeni nyamazana ezifuyiweyo lapha ekhaya emaxhibeni. Loba yizinja ezisekhaya ziyafundiswa ukuthi zingangeni emaxhibeni zilandela abanikazi bazo.

Le yonke leminye yimithetho ebusa amaxhiba egumeni kubekanti kulemithetho ebusa amaxhiba phakathi kwayo indlu. Esandleni sayo sokudla indlu le yikho okulalwa khona, isivalo sivula sisiyakhona.Kuthi esandleni senxele yikho okuhlalwa kona akulalwa ngapho. Kuthi emsamo wendlu yikho okubekwakhona izimpahla zabanikazi bexhiba. Phakathi laphakathi kwedlu kufakwa imiceciso yabantwana lezipho zabo ezihle abazitholayo ebantwini abehlukeneyo.

Akulampahla ezivunulwayo eziphoselwa phansi ngaphandle kwama nyathela lezicathulo.

Kulesikhathi during the day okuvunyelwa khona ukuthi abanikazi bamaxhiba babesemaxhibeni abo. Umntwana kaphongungena nje exhibeni loma nini athi nya, sekungondliwa ivilavoxo lapha ekhaya phela elingakwazi ukubamba ngezandla zalo imisebenzi ephilisa umuntu.

Ayeqakatheke kangako amaxhiba koMthwakazi isakhamuzi simangalelwa siyethonisiswa ukuthi kungani silabantwana egumeni kodwa singelamaxhiba abo. Singehluleka ukwakha amaxhiba abantwana umnyaka usiyaphela siyaxotshwa esigabeni ngoba sizakhupha abantwana abazakuba yi poison lapha esigabeni. Kwakuyikuhlukuluza abantwana ukuthi bangakhelwa amaxhiba abo egumeni lapha.

Kuza kuthi kunjalo wonke umtwana esigabeni ubalexhiba lentanga yakhe abakhuliswa ndawonye bafundiswe amaSiko esigaba bendawonye belixhiba sekusitsho a solid group yalaba bantwana abango ntanga lapha esigabeni. Kwakusiba lamaxhiba amantombazana lamaxhiba abafana lapha esigabeni. Njengamaxhiba asemagumeni lala awabantu esigabeni lapha ayelemithetho yawo ewabusayo.

Ngakho umfana nxa esekhulile lapha ekhaya esekhonjiwe sekumele athathe umfazi into eyakuqala okumele ayenze yikuthi kumele akhele lowo mfazi asesiyamthatha a very nice cool house lapha ekhaya lapha azafika amuphe ibeyindlu yakhe umakoti. Ngomtshado weSintu akabuyi umakoti azokwenda ekhaya engakhelwanga elakhe ixhiba elizahlonitshwa ngemithetho lemikhuba yamaxhiba emagumeni wonke.

Umakoti ufika ke aphiwe elakhe ixhiba alakhelwe yisithandwa sakhe. That is her first present of her wedding a house built for her by her husband to be. Nxa umfana engazake akhele umkakhe a nice house then kakakhuli njalo kala capacity yokuthatha akhele abantwabakhe amaxhiba abo ngoba ngeSintu le Siko likaMthwakazi umuzi ngamaxhiba abantwana. Umuzi ngabantwana.

Ngakho umakoti uthathwa exhibeni likayise lonina ayefakwa kwe lakhe ixhiba egumeni azokwendela kilo. Usungumtshado weSintu ke lowo.

© Khulu Cont Mhlanga - 24 November 2021 

All Rights Reserved

Authorised publishers - #TheWalk