UKukhombisa ...Umtshado WeSintu Part 1.  --- #12
 
UkuKhombisa

Ijaha nxa lisondelela intombazane lisiyayi cela ukuthi bathathane yikho ukukhombisa. Asikubekeni ngesiNdenglish.....proposing marriage yikho ukukhombisa, hatshi nxa ucela untombazana nje ukuthi akuthande beselisiya emacansini. Akusikho kukhombisa lokho yikufeba.

Lingathi ngesikhathi sokuSoma umfana acine ephose induku wanemba ngephutha umtwana ozalwa lapho kuthiwa ngamaHlaya Endlela, kusitsho umtwana hatshi ozelwe ngokufeba kodwa ozelwe ngethuba lokuSoma.

Nxa ujaha ekhombisa useqalile ukuphendla indlela yomtshado. Ngesikhathi sombuso kaMthwakazi wonke umuntu ubele two choices zomtshado. Ukutshada ngokoSiko le Sintu sesizwe sangakibo loba ukutshada ngoSiko le Sintu sakoMthwakazi.

Lokhu kusenziwa yikuthi uMthwakazi ubunjwe yizizwe ezehlukeneyo eziphila ndawonye ngakho zacuphelana amaSiko leSintu sezizwe zabo kwasekudaleka Amasiko akoMthwakazi kungama Siko asehlanganisa awesizwe esithize lawezizwe ezithize.

Ngakho abatshadayo babekhetha ukuthi bona bazahlanganiswa ngoSiko lwesizwe sabo loba ngoSiko lwakoMthwakazi.

Kasiqathaniseni ngezizwe ezintathu zingezinye zezizwe ezibumba uMthwakazi. AmaKhalanga, AmaTonga lamaNdebele(AMahlabezulu)

Asiqondiseni lapha ukuze singalahlekelani kulesi Isihloko. AmaKhalanga kumbe AmaTonga loba AbeSuthu, kumbe AmaVenda kasoMaNdebele. AmaNdebele ngabeza leNkosi uMzilikazi kodwa bona babengazibizi ngokuthi MaNdebele babezibiza ngokuthi NgamaHlabezulu ka Mzilikazi, beqale bezibiza ngokuthi bangaMantungwa ka Mzilikazi besuka eNgome.

Zonke ke lezi izizwe ngokuzihlanganisa kwazo zibumba uMthwakazi. Ngesikhathi sombuso kaMthwakazi zonke lezi izizwe zazizimele zodwa ngamaSiko azo zihlangana ngokwakhiwa kwamaButho langokwendiselana langezomnotho, ukuthenga lokuthengiselana.

Ngakho ke abakhombisanayo babelakho ukukhetha ukutshada ngesiNdebele, loba ngesiKhalanga loba ngesiTonga kumbe njalo ngobuThwakazi kusitsho ukuxubanisa iSintu sezizwe lezi zontathu.

Kuthe sekungene ukutshada kwesilungu kusiza lama Church, abantu babalakho njalo ukukhetha ukutshada ngesintu sesizwe sabo, loba esikaMthwakazi loba isilungu. They now had three choices.

Lalamhlanje wonke umuntu okhombisayo ukhululekile ukutshada ngeSintu sesizwe sakhe, loba ngeSintu sikaMthwakazi loba ngeSintu sabeLungu.


UMehluko wokuKhombnisa ngeSiko lezizwe

Ukukhombisa kweSindebele kwehlukene lokwesiKhalanga lokwesiTonga. Sithe sizalinganisa ngalezi zontathu for the sake of better understanding ngokukhombisa. IsiNdebele ngeSiko le Sintu sabo kasila Dombo..a go between person. Yikukhombisa kweSiko le Sintu sesizwe sesiKhalanga leso.

 AmaNdebele asesebenzisa isiko leDombo ngoba sebenguMthwakazi.Sebethethe ubuhle beDombo esikweni labaKhalanga balisebenzisa labo selingelabo.

NgesiNdebele umfana le ntombazana bayazibambela bazikhulumele yonke into yokuthathana lokutshada kwabo. Kabalayezeli ngeDombo. Ujaha nxa esefuna ukuthatha intombazana uyayikhunga ngesipho, yikho ukukhombisa kwakhona. Intombazane ithathe isipho lesiyana iyelaso kugogo wakhe ozala uyise. Isisuke yahlala isihamba indaba. Lomfana ngakibo wenza okufanayo, isuke ihlale. Nxa kulelizwi eliyakojaha linikezwa intombi yakhe ilise kujaha kuthi ujaha alise kugogo wakhe ozala uyise. Kubenjalo nxa lisiya kontombazana.
Akula Dombo elingena ndawo.

Nxa uGogo ozala ubaba engekho kuyiwa kuBabakazi. UBabakazi ngudadewabo kababa. Nxa udadewabo kababa engekho kuyiwa kuMalumekazi, kuphele lapho. Izaphathwa njalo indaba uMakoti aze ayeMekeza kibo kajaha. Akuyiwa ebanganini....kuba yisiDombo leso.

Kukanti ngeSiko le Sintu lesiKhalanga ujaha angavele akhulumisane azwanane lonkazana sekudingwa iDombo ngakomfana kudingwe iDombo ngakonkazana. Yasuka yahlala iDombo lizaze liyekwethulwa phezulu kweBonda ngesikhungo mhlawelanga lomgido woku Khupha umGaxo kibokamfana zikhala zibubula ingungu zeziKhalangeni kudlala unyawo lomuntu phansi. Umakoti lelo langa usendile usengowekhaya ngokweSiko le Sintu sesiKhalanga.

Kukanti ngeSiko le Sintu sesiTonga wonke unkazana ozizwa esekhulile eselungele ukuyakwenda uyaceca aqonde emgidweni obizwa ngabadala besigaba kuyiwe gidwa lapho amadoda adlele. Kunyakaze iqolo kuphambane izihlalo. Ujaha angabona amfunayo uyamqukula abaleke laye ayemvalela endlini yakhe kibo kajaha. Abakade belonkazana emgidweni lo bazafika bekhuluma ekhaya ukuthi uzibani uqukulwe ngubani, ihle iqale kanjalo indaba yokuthi batshade laba bobabili.
Kukhonjiswa ngokuqukulwa emgidweni wesigaba wonke umphakathi ekhona libalele.

Kodwa lamhlanje lezi zizwe zontathu sezisebenzisa isiko le Sintu samaDombo. Ngakho ke iDombo sekwaba yilo iSiko le Sintu sakoMthwakazi nxa mhlazana ujaha ethe wacabanga ukuKhombisa athathe.

Isixwayiso:

Majaha lamankazana lingadibana endleleni likhulumisane ngezothando kalikakhombisani....liyasoma nje. Angawela ayengeke unkazana licine lisecansini liyafeba nje. Unkazana angathatha isisu umntwana ubalicala lokufohla umuzi wabantu. Kuphuma ithokazi lenkomo kungakakhulunywa lutho ujaha ahlawule lelo cala kuqala elokufohla uthango lomuzi wabantu andubane kuzalandela zonke ezinye izinkulumo lezinhlawulo.

© Khulu Cont Mhlanga - 27 October 2021

All Rights Reserved

Authorised Publishers: #TheWalk